يعني إيه مسامية الشعر؟
مسامية الشعر مصطلح بيدل على مدى قدرة الشعرة على امتصاص الرطوبة والاحتفاظ بيها.
مسامية الشعر ليها درجات مختلفة، ممكن تفرض عليك اتباع روتين عناية خاص بالشعر تبعًا لدرجة مسامية الشعر عندك.
وعشان تفهم موضوع مسامية الشعر بشكل أفضل، فخلينا نتعرف مع بعض على الطبقات اللي بتتكون منها الشعرة، وهي:
قشرة الشعرة:
قشرة الشعر هي الطبقة الخارجية اللي بتغلف الشعرة وبتحمي طبقاتها الداخلية، وبتتكون من قشور صغيرة مرصوصة بشكل يشبه اصطفاف حجارة القرميد على أسطح المنازل.
لحاء الشعرة:
ودي أكتر طبقة سميكة في الشعرة، بتحتوي على صبغة الشعر الطبيعية، بالإضافة لألياف بروتينية.
نخاع الشعرة:
نخاع الشعرة هو الجزء الناعم من الشعرة اللي بيتوسط طبقات الشعرة.
مسامية الشعر بتتعلق بالجزء الأول، الجزء الخارجي من الشعرة تحديدًا.. اللي هو قشرة الشعرة؛ اللي منه بنحدد قدرة الشعرة على امتصاص الرطوبة والاحتفاظ بيها تبعًا لتراص القشور الصغيرة المكونة للقشرة الخارجية للشعرة.
أسباب مسامية الشعر
درجة مسامية الشعر بتتأثر بعوامل بيتم تصنيفها عادةً في فئتين، وهما:
عوامل متعلقة بالوراثة والجينات، زي: العرق اللي بينحدر منه الشخص، وسرعة نمو الشعر، والأمراض الوراثية.
عوامل خارجية، زي: طريقة التمشيط، والعلاجات اللي بيتم تعريض الشعر ليها، ونوع الشامبو وطريقة استعماله.
درجات مسامية الشعر
ودي درجات مسامية الشعر:
الشعر منخفض المسامية
الشعر منخفض المسامية هو الشعر اللي بتكون القشور الصغيرة المكونة لقشرته الخارجية مرصوصة، وده بيصعّب على الرطوبة اختراق الشعرة أو تغلغلها لطبقاتها الداخلية؛ بس لما بيمتص الرطوبة، مش بيتخلص منها بسهولة، يعني مش بيجف بسهولة بعد الشاور.
بسبب بطء الوتيرة اللي بتتسلل بيها الرطوبة للشعرة، فمنتجات العناية بالشعر المستخدمة والدهون المختلفة بتتراكم على سطح الفروة مع مرور الوقت.
ودي أهم النصايح اللي بنوصى بيها للعناية بالشعر منخفض المسامية:
- قص أطراف الشعر بانتظام، لأن أطراف النوع ده من الشعر بتقى هشة وجافة بسرعة.
- استخدام البخار أو لف الشعر بفوطة مبلولة سخنة، أو استخدام الزيوت الدافية على الشعر، عشان الاستفادة من الحرارة بالطرق دي بتخلي القشور المكونة للشعرة تتباعد شوية عن بعضها وبتسمح للشعرة بامتصاص الرطوبة.
- التركيز على استخدام الزيوت دي للشعر:
زيت جوز الهند، وزيت الجوجوبا، وزيت الأرجان.
وفيه شوية نصايح تانية زي: استخدام شامبو لتنضيف الفروة مرة واحد أسبوعيًّا، واستخدام ماسكات الترطيب اللي بتحتوي على الموز أو الأفوكادو مرة كل أسبوعين، واستخدام كميات معتدلة من مستحضرات العناية بالشعر.
2. الشعر معتدل المسامية
الشعر معتدل المسامية هو الشعر اللي بتكون القشور الصغيرة المكونة لغلافه الخارجي مرصوصة بشكل معتدل، بمعنى إن المسافات بينها بتسمح للشعرة إنها تاخد كفايتها من الرطوبة وتحتفظ ببها.
بسبب اعتدال مسامية النوع ده، الشعر بيظهر بشكل صحي ولامع وكثيف.
والشعر معتدل المسامية مش بيحتاج لأي إجراءات عناية خاصة، بالعكس، تصفيفه والعناية به بتكون سهلة وبطرق بسيطة.
ودي أهم النصايح اللي بنوصي بيها للعناية بالشعر معتدل المسامية:
- عدم الإفراط في تعريض الشعر للحرارة وللمواد الكيميائية الضارة، زي الصبغات.
- تجنب الإفراط في استخدام مستحضرات الشعر، وتجنب المستحضرات اللي بتتكون من سيليكون مصنع من مواد دهنية أو زيتية.
3. الشعر عالي المسامية
الشعر عالي المسامية هو الشعر اللي بتكون القشور الصغيرة المكونة لغلافه الخارجي متباعدة، وده بيسمح للشعر بامتصاص الرطوبة بسرعة وفقدانها بسرعة برضه!
عشان كده غالبًا بيكون الشعر ده جاف وضعيف وهشّ، زي كمان ما بيكون معرض أكتر للتشابك من الأنواع التانية.
ودي أهم النصايح اللي بنوصي بيها للعناية بالشعر عالي المسامية:
- عدم الإفراط في غسل وتمشيط وتصفيف الشعر، وإنك تكون حريص على الاستخدام المنتظم لمستحضرات مناسبة تحمي الشعرة وتغلفها.
- استخدام الماسكات والزيوت قبل الاستحمام، عشان ده بيساعد الشعر على امتصاصها بطريقة أفضل، أو استعمال المرطب اللي ممكن نسيبه على الشعر (Leave-in conditioner) مرة كل يومين.
- تجفيف الشعر على درجات حرارة منخفضة أو نسيبه ينشف لوحده في جو الغرفة.
- التركيز على استخدام الزيوت دي للشعر:
زيت جوز الهند، وزيت الجوجوبا، وزيت الأفوكادو، وزيت الزيتون. - غسل الشعر بماء بارد مع الشاور.
اختبار مسامية الشعر
محتاج تعرف درجة مسامية شعرك ومش عارف؟
جرب طريقة من الطرق دي:
1. اختبار العطر
زور مكان فيه عطور نفّاذة، وماتطلعش منه قبل ما تعدي نص ساعة . دي النتايج اللي هتشوفها، ومعناها:
- لو كانت ريحة شعرك بعد ما تطلع اكتسبت ريحة المكان اللي كنت فيه، فشعرك عالي المسامية.
- لو ريحة شعرك ماتغيرتش، فشعرك منخفض المسامية.
- لو اكتسب الشعر ريحة خفيفة، فشعرك متوسط المسامية.
2. اختبار الطفو
عشان تعمل الاختبار ده، هتاخد شعرة راس جافة واحدة أو أكتر، وهتسقطها في كوباية ماء معتدلة الحرارة، وتراقب الشعر لكام دقائق. دي النتايج اللي هتشوفها، ومعناها:
- لو غرقت الشعرة واستقرت في القعر، معناه إن الشعر عالي المسامية.
- لو بدأت الشعرة تغرق ببطء هيكون الشعر متوسط المسامية.
- لو طفت الشعرة على السطح أو استقرت تحت شوية، هنعرف إن نوع الشعر منخفض المسامية.
